Tane Konsumidor

(+670) 3310938
cac@tanekonsumidor.tl

PANDEMIA NO IMPAKTU IHA KONSUMU: DESAFIU NO KONSELLU

Pandemia COVID-19 mai muda konsumidór hotu hotu nia moris no hábitu sira, liuliu sira ne’ebé vulnerável liu, hanesan balun ne’ebé hela iha zona rurál, kbiit la’ek ka iha situasaun profisionál ne’ebé prekáriu.

Ho konfinamentu no serka sanitária, no agora ho tan inundasaun, konsumidór barak, liuliu sira ne’ebé estuda ou servisu dook hosi sira nia uma no la iha asesu ba sasan no servisu balun.

Timor-Leste asiste daudaun aumenta dezempregu, aumentu risku ba seguransa alimentár no situasaun hamlaha ho falta ba nutrisaun. Konsumu ida ho kualidade no justu ohin loron difisil ba ema ho família sira, ba sira ne’ebé iha difikuldade atu asesu bein esensiál sira, garante kualidade ba sasan no servisu no evita risku ba seguransa ho saude.

Ho buat hirak ne’e, TANE Konsumidór servisu makaas atu defende konsumidór sira liuliu fahe informasaun, konsello no estratéjia hodi ajuda hola sasan ho di’ak.

Ami husik alerta sira tuir mai ne’e ba konsumidór :

1. HALO PLANU BA AIHAN
Hanoin saida mak atu tein iha semana ida tomak, ho nune’e fasil atu identifika produtu ka sasan sira ne’ebé nesesita, atu hatene halo aihan ne’ebé ekilibrada no zere di’ak konsumu aihan matak sira, hodi labele estraga.
2. HALO LISTA ATU HOLA SASAN
Hakerek ita nia lista ba kompras no verifika se tuir planu ba atu hola aihan, sira ne’ebé ita presiza duni iha uma, ba limpeza, ijiene, saude, ba hatais nian nst. Nune’e bele hatene atu gasta de’it osan ba buat ne’ebé koresponde ho ita nia nesesidade, evita tia gastu sira ne’ebé la presiza.
3. IHA LORON REGULÁR IDA ATU BA HOLA “SASAN BARAK”
Dala barak ita hola sasan ho durasaun naruk, tamba ne’e hili loron ida hodi ba hola sasan – semana ida dala-ida, loron sanulu resin lima dala-ida ou fulan ida dala-ida. Buka solusaun ida di’ak liu ba ita.
Hola sasan barak iha vantajen, bele aproveita promosaun ka diskontu, bele mos hola aihan iha embalajen ho kapasidade boot, geralmente baratu liu. Ezemplu se hola sampo litru-ida nian em vez de hola frasku tolu 375ml nian, provavelmente sai baratu liu, tamba folin litru ida nian baratu liu iha embalajen ne‘ebé boot.
4. BA HOLA SASAN WAINHIRA ITA PRESIZA DUNI
Iha faze ida ne’e, wainhira ita la ba hola sasan dala barak, diak liu ba ita nia seguransa no mos ema seluk nian. Importante nafatin atu halo planu no lista ba hola sasan. La ba hola sasan dala barak, iha posibilidade kiik atu distrai no hola sasan sira neébé la presija.
Se hakarak bele koko hola sasan on-line. Iha tempu badak ami sei iha konsellu kona de’it ba hola sasan on-line. Atentu nafatin
5. PRODUTU FRESKU – MODO TAHAN NO AIFUAN SIRA
Aihan fresku sira importante ba alimentasaun ekilibrada. Aproveita másimu aihan fresku tamba iha valór nutrisionál ne’ebé aas tebes. Wainhira hola aihan fresku evita atu liman kona ba, tamba bele estraga ou aselera atu estraga.
Labele hola barak liu, rai didiak no loloos para bele halo sira dura.
Uza uluk aihan fresku depois mak aihan sira iha lata ou konjeladu. Hare ba atu at ona konjela ou tein daudaun ona. Labele soe estraga de’it
6. KOÑESE SASAN SIRA NE’EBÉ ATU HOLA
Ami fó hanoin fali importánsia ba informasaun, se lee label hosi produto alimentár sira, sei hetan informasaun importante sira: data validade nian ho konsumu atu labele kosusumu sasan estragadu, ingrediente sira se iha kazu alerjia, valór nutrisionál sira ba dieta ekilibrada no mos forma di’ak liu atu konserva sasan sira (temperatura, espojisaun ba loron, nst.)

Iha dúvida? Presiza apoiu?
Ko’alia ho TANE: cac@tanekonsumidor.tl | +670-3310938| Travessa Vila Verde – Aldeia Gideon – Dili