Tamba konsumidór timor-oan sira hola ona sasan online, TANE Konsumidor ohin publika vídeo konabá hola sasan online ho tema, “ oin sa hola sasan iha internet”

Hola sasan husi  empreza  ka vendedor ida  iha internet liu housi plataforma virtual própria la hanesan ho iha loja fijika ida. Possibilidade konsumidór sira hola sasan ka servisu sira diretamente hosi vendedór iha internet bele asesu ba vendedór no produtu sira  barak liu  ho folin ne’ebé di’ak  liu.

Maibé, importante ba konsumidór sira hatene problema ka risku sira ne’ebé bele mosu iha hola sasan online. Iha hola sasan online ita labele koko, kaer, no haree, molok atu hola. Tamba ne’e presija dalan seluk atu iha serteza, hola iha sé no saida maka ita hakarak.

Tamba ne’e, ami fó hanoin ba konsumidór sira atu:

• Kompara folin husi produtu oin-oin, no se bele, hosi vendedór oin-oin mos.
• Deskonfia no analija didi’ak produtu sira maka folin ki’ik liu, bele mos, fraude, produtu aat ka falsu.
• Verifika (haree didi’ak) termu sira no kondisaun konabá atu fó fila-fali no troka, kontaktu sira hodi bele rezolve problema sira ne’ebé maka bele mosu.
• Iha atitude krítika no haree ba karakterístika no oinsá produtu sira ne’e funsiona antes atu hola.
• Buka hatene avaliasaun hosi konsumidór sira seluk konabá site ka husu ema sira ne’ebé ita hatene oinsá sira ninia hanoin konabá plataforma online.

Iha Timor-Leste Konsumidór barak maka seidauk hatene konabá komérsiu online. Ita bele haree katak klosan sira maka hahú toman ho prátika  foun ida ne’e. Liu husi rede sosiál no site sira ne’ebé iha konfiansa nasionál no mos internasionál. Tamba ne’e, TANE Konsumidor nafatin hala’o servisu hodi informa ba konsumidór sira liliu konabá iha kuidadu atu hola sasan online Importante konsumidór sira hatene defende sira nia an no hatene katak bele sura ho apoiu TANE nian

TANE disponível atu tulun hodi esklarese konabá asuntu saida de’it maka relasiona ho  hola sasan online liu husi kontaktu sira tuir mai ne’e: Telefone 3310938; e-mail
cac@tanekonsumidor.tl, website www.tanekonsumidor.tl no iha sede TANE nian  Travessa Vila verde – Aldeia Gideon – Díli Timor-Leste.

Ami fó hanoin fila fali, vídeo dahuluk publika iha https://tanekonsumidor.tl/?p=5160&lang=tp) no, semana oin mai, ami publika tan vídeo ida.  Atensaun nafatin!