Tane Konsumidor

(+670) 3310938
cac@tanekonsumidor.tl

ITA HATENE TANSÁ IMPORTANTE ATU KONSUMIDÓR SIRA REKLAMA?

Caro consumidor,
Wainhira ita ba halo kompra iha supermerkadu ka loja eletrodoméstiku sira no sente ka akontese violasaun ba ita-nia direitu? No dalaruma kontrata servisu telekomunikasaun ka servisu seluk no sente katak buat ne’ebé ita-boot hola la hanesan ho buat ne’ebé ita hanoin?
Karik buat sira ne’e akontese, tenke hanoin katak: importante tebes atu halo rekalamasaun! Posível atu hetan solusaun no hodi bele denúnsia ba iha situsaun injusta sira, ne’e liu-hosi de’it ita-boot sira nia reklamasaun.

.

Dala-wa’in, konsumidór sira iha Timor-Leste la reklama no reivindika ba iha kumprimentu ba sira nia direitu no lejítimu interese sira, hatudu sira ninia lamentasaun liu-husi de’it rede-sosiál sira, biar sira hatene hela katak, buat ne’ebé maka akontese hanesan infrasaun todan ida ba iha sira ninia direitu hanesan konsumidór. Tan ne’e, nafatin atu reklama, ba iha defeitu ka avaria bein sira ka prestasaun ne’ebé la adekuadu iha servisu. Lei iha no tenke halo tuir: produtu sira tenke iha validade, folin tenke momos no loloos hodi ema bele haree, rótulu sira, kontraku no garantia tenke iha dalen tétum ka portugués, bein movel tenke iha garantia ba tinan 1.

Hosi biban ida ne’e, TANE hakarak akonsella no enkoraja konsumidór timór-oan sira atu ezerse ativamente imi ninia sidadania.
Ho de’it reklamasaun maka ita bele rezolve kazu espesífiku sira hodi konsumidór sira no bele iha kbiit hosi ezije mudansa no hadi’ak lei sira hodi proteje konsumidór sira.
Liu-husi de’it denúnsia maka ita bele obriga empreza sira hodi kumpre norma sira ne’ebé maka vigór no ezije ba entidade reguladór sira hodi halo tuir sira ninia papel.

Konsumidór barak maka husu mai ami: “Seráke halo reklamasaun ne’e iha rekompensa?”. SIM, hanesan resposta. Tanba iha kazu barak, ema hirak ne’ebé maka reklama sente no haree sira ninia kazu rezolvidu.
Iha kazu sira ne’ebé maka TANE ajuda tiha ona, barak maka hetan vitória: servisu ba atendiemntu no respeita ba konsumidór sira komesa di’ak, empreza sira fó fila valór ne’ebé maka selu tiha ona, empreza komesa ona tau folin ba sasan nia lolon no verifika mos ninia validade, empreza sira kumpre ba garantia no hadi’ak fila fali bein hira ne’ebé maka avaria no iha oferta ba rekompensa iha prestasaun la di’ak servisu TV Kabu ninian.

Tan ne’e, wainhira ba halo kompra ba produtu ka kontrata servisu ida, no iha relasaun hola no fa’an ida ne’e, empreza sira viola imi nia direitu hanesna konsumidór, reklama ba TANE Konsumidor.

Maibé, oinsá atu reklama?

Atu ita-nia reklamasaun ne’e forte liu tan, importante tebes husu no rai didi’ak fatura ka resivu kompra nian no komprovante garantia ninian. Hodi nune’e bele reklama:
a) Entra kontatu ho fa’an-na’in ka empreza
Explika ita nia situasaun no solisita rezolusaun ba ita-boot ninia direitu hanesan: reparasaun, troka, redusaun ba folin ka bele mos fó fila valór ne’ebé maka selu tiha ona.
b) Formaliza ita nia keixa ba TANE

Se ita nia pedidu hetan rekuzasaun ka solusaun ne’ebé maka aprezenta hosi parte empreza nian la satisfaz ita-boot, entaun, rai hamutuk komprovativu pagamentu nian, sertifikadu garantia no dokumentu sira seluk no ba iha TANE ka bele mos liu hosi telefone, e-mail, Facebook ka prezensiál. Ita bele mos haruka ita nia reklamasaun sira ba autoridade kompetente sira.

Wainhira ami simu reklamasaun, TANE sempre analiza situasaun sira no, hafoin, halo kontatu ho empreza atu husu prosesu mediasaun hodi bele hetan solusaun. Maibé, karik empreza lakohi kolabora, TANE sei halo fila fali keixa ida ba entidade reguladór ne’ebé maka iha poder atu inspesiona no sansiona no ami insiste nafatin ho entidade reguladór sira, to’o hetan solusaun.

Konsumidór sira ninia reklamasaun hanesan kombustível TANE nian, hodi bele iha forsa atu reivindika perante empreza no autoridade sira. Ita hatene hafoin lé artigu ida ne’e, no wainhira ita nia direitu violadu, kontatu TANE no ami bele ajuda hodi defende imi ninia direitu no lejítimu interese sira.

Hamutuk, ita sai forte liu tan! Hamutuk ita obriga empreza atu halo tuir lei sira no respeita direitu konsumidór sira nian.

TANE nia odamatan nafatin nakloke ba konsumidór sira. Vizita ami nia site www.tanekonsumidor.tl, hakerek ba ami cac@tanekonsumidor.tl , telefone ba +670 3310938 no partisipa iha pájina Facebook https://www.facebook.com/TaneKonsumidor, ho like, komentáriu no partilla sira.