Tane Konsumidor

(+670) 3310938
cac@tanekonsumidor.tl

VIAJEN NE’EBÉ KANSELA TIHA ONA TAN PANDEMIA, COVID-19

Tinan 2020 sai tinan ne’ebé extraórdáriu no inuzitadu tebes tan de’it Pandemia Covid-19 nune’e mos tinan 2021 hanesan tinan ne’ebé dazafiante. Hodi prevene diseminasaun vírus, nasaun barak maka hola medida hodi hamenus sirkulasaun aviaun sira, krujeiru no autocarro sira.

Ho medida hirak ne’e, voo ka viajem barak maka kansela, ho jera dúvida-wa’in konabá pasajeiru ninia direitu sira iha viajem internasionál sira. Nune’e, ita hotu hatene katak, alterasaun, adiamentu no kanselamentu voo ka viajem surprende ema barak. Tan ne’e maka, fundamentál tebes konsumidór sira hatene konabá sira ninia direitu sira no oinsá maka direitu hirak ne’e bele aplika iha situsaun Pandemia Covid-19.

Maluk konsumidór, imi iha tiket viajem ne’ebé maka selu tiha ona ka planu atu viajem sai husi Timor-Leste? No imi nia viajem kansela tiha no empreza lakohi fó fila imi ninia osan?

Foin lalais ne’e, TANE, liu hosi ninia Sentre ba Apoiu Konsumidor sira (CAC sigla iha dalen portugués), rejistra reklamasaun rua konabá asuntu refere.

  • Kazu dahuluk konabá konsumidór ida ne’ebé maka hola ninia billete aviaun iha final tinan 2019 ho objetivu atu pasa férias sai husi Timor-Leste. No viajem prevista tiha ona ba funal abril tinan 2020 no kansela tiha tan de’it Pandemia. Konsumidór liga kedas ba TANE hodi halo intervensaun ho hanoin ida atu konsegue husu fali osan ne’ebé maka sleu tiha ona ba viajem ne’ebé maka kansela tiha. Hafoin TANE kontatu ho empreza reklamada no komesa halo prosesu mediasaun no konsegue duni empreza kumpre saida maka hateten iha Lei, ka fó fila montante ne’ebé selu tiha ona ba konsumidór.
  • Denúnsia daruak nian mos konabá viajem kanselada hosi konsumidór ida ne’ebé maka planeia atu pasa férias iha Singapura iha fulan marsu tinan 2020, maibé viajem refere la akontese tan de’it situsaun ne’ebé maka kauza hosi Covid-19. Durante tinan ida ho balun, konsumidór mesak de’it, tenta ho empreza atu husu fila fali osan ne’ebé maka selu tiha ona, no pedidu konsumidór nian nafatin hetan rekuza hosi empreza. No ikus liu, konsumidór husu ajuda ba TANE, no ekipa jurídika TANE ninian rejistra no halo analiza ba denúnsia, hafoin kontatu ba empreza reklamada. Menus husi semana ida empreza fó fila ba konsumidór totál osan ne’ebé maka selu tiha ona.

Komprovadu katak, Pandemia ne’e eventu extraórdináriu ida, maibé, konsumidór sira nafatin iha direitu hodi husu fila osan ne’ebé maka selu ona ba viajem ne’ebé maka la realiza, motivu sira ne’e sempre la imputável ba konsumidór sira. Se viajem ne’e kansela tiha ona, konsumidór la iha opsaun atu ba ou lae.

Ita nia lejislasaun hatuur protesaun ne’ebé maka plenu ba konsumidór sira iha kazu wainhira la iha kumprimentu ba prestasaun servisu, ho reembolsu imadiatu ba valór ne’ebé maka selu tiha ona.
Atu ida ne’e akontese, hanoin katak, konsumidór sira tenke rai didi’ak komprovante hotu hodi aprezenta ba empreza ka uza durante reklamasaun: fatura, komprovativu pagamentu sira, kópia panfletu ka kondisaun venda nian, noentre sira seluk.

Hafoin lé tiha artigu ida ne’e, karik ita-boot sira iha viajem ne’ebé maka kansela ka koñese ema ruma maka la iha viajem, kontatu ba TANE hosi telefone 3310938, e-mail cac@tanekonsumidor.tl ka prezensialmente iha ami nia fatin iha Travessa Vila verde – Aldeia Gideon – Díli Timor-Leste.

TANE ajuda imi hodi defende imi ninia direitu no interese sira.