Tane Konsumidor

(+670) 3310938
cac@tanekonsumidor.tl

REKLAMASAUN FULAN SETEMBRU NIAN – SERVISU PÚBLIKU ESENSIÁL “TELEKOMUNIKASAUN”

 

Iha artigu ida ne’e, ha’u sei ko’alia liu konabá servisu públiku esensiál ba iha telekomunikasaun, liuliu konabá Internet, ka ita bele dehan, kualidade prestasaun ba servisu Internet nian iha Timor-Leste daudaun ne’e, iha era teknolojia.

Internet hanesan veíkulu bot komunikasaun nian ne’ebé maka disponível ba sidadaun hotu-hotu, no liu hosi servisu ida ne’e bele hetan informasaun, bele estuda, servisu, diverte no entre atividade sira seluk.

Ho relasaun ba iha Pandemia Covid-19 nian, home office no edukasaun distánsia sai tiha hanesan atividade bain-bain ita emar nian, no, ho nune’e, Internet dala-wa’in sai tiha nesesáriu. Konsumidór presiza atu servisu ne’ebé presta hosi operadora sira tenke iha kualidade.
No problema ho koneksaun ba Internet nafatin akontese dala barak.

Karik akontese falla ruma ne’ebé impede hodi uzufrui ba servisu Internet ne’ebé maka konsumidór sira kontrata ona, saida maka ita bele halo?
Importante tebes, ami fó hanoin katak, empreza hotu-hotu obrigatóriu atu fornese servisu ne’ebé maka adekuadu, efisiente, seguru, no konabá ba iha servisu públiku esensiál sira, tenke halo prestasaun ho dalan kontínua no la ho interupsaun ruma.

Maibé, pergunta maka ne’e: se iha Timor-Leste lei rekoñese katak “telekomunikasaun” hanesan servisu públiku esensiál ida, tansá maka prestasaun ba servisu ida ne’e fraku loos iha kualidade, ho neineik tebes no ho interupsaun hela de’it?

Iha momentu hirak ne’e, hanesan momentu ne’ebé delikadu tebes tan kauza hosi Covid-19, TANE Konsumidor observa situasaun rua ne’ebé relasiona ho kualidade ba prestasaun servisu Internet iha Timor-Leste. Ba dahuluk maka aumenta ba demanda Internet iha merkadu timór nian, iha ne’ebé dala-barak, operadora sira la respeita aspetu báziku sira konabá servisu esensiál nian, ho durasaun oras rua liu ba iha interupsaun, no operadora sira rasik, dala-wa’in, rekuza atu reembolsa ka fó fali krétidu (pulsa) ba iha utilizadór Internet sira ne’ebé prejudikadu.

Iha sorin seluk, konsumidór sira mos ladauk hatoman-an atu halo keixa ba iha autoridade relevante sira. Ami nota katak, barak maka expresa sira nia lementasaun iha rede sosiá de’it wainhira akontese interupsaun konabá servisu públiku esensiál sira, liu-liu Internet. Maibé, ituan de’it maka ofisializa sira nia keixa hamutuk ho TANE ka ba autoridade kompetente sira.

Tan ne’e, maluk konsumidór sira, TANE informa katak, imi nia direitu hanesan konsumidór ejiste no proteje tiha ona iha ita nia Konstituisaun. Hahú agora, konsumidór sira tenke hatene katak, wainhira imi nia direitu violadu, labele ta’uk atu halo denúnsia ba autoridade reguladora no mai ami nia asosiasaun TANE.

Se maka reklama, nia problema sei iha solusaun. No, se ita reclama ohin, ajuda tebes iha loron aban atu ema ruma labele sai tan vítima ba hahalok komersiál abuziva sira.

Kontatu mai TANE aju bele ajuda hodi defende imi nia direitu no interese sira.
Vizita ami nia site www.tanekonsumidor.tl, hakerek mai ami, liu-hosi cac@tanekonsumidor.tl no partisipa iha ami nia pájina Facebook https://www.facebook.com/TaneKonsumidor, ho like, komentáriu sira no fahe-tutan!

FIM.