Tane Konsumidor

(+670) 3310938
cac@tanekonsumidor.tl

KONSUMU KONSIENTE NE’E OBRIGASAUN IDA ITA HOTU NIAN

Iha sociedade ida hanesan Timor-Leste nian, klasifika hanesan pais ih via dezenvolvimentu, ita hare momos katak maioria husi produto sira ne’ebé ita konsumu, mai hosi rai liur ka importadu. Tamba ne’e, impoen ba konsumidór sira atu hanoin konabá etika iha konsumu, hanesan responsabilidade ba iha impokatu husi ita nia eskoilla.

Ita moris iha sosiedade konsumu, hanesan sosiologu Zygmut Bauman defende, katak, ita nia sociedade ne’e sociedade likida. Prova maka produsaun ba bens no servisu akontese daudaun ho velosidade ida ne’ebé as tebes, hanesan mos ritmu husi konsumu ne’e rasik. Maioria husi produto ka servisu sira ne’ebé ita hetan, mesak descartáveis, uja dala ida soe ona. Mezmu ke sira be uja dala barak, maibe ninia durasaun badak tebes.

Laos deit roupa ka ita nia ekipamentus sira maka la dura, aihan sira mos to’o ba konsumidór kadaves prontu atu han lalais kedas no ho embalagen ne’ebé barak tebes.

Timor-Leste pais foun ida no nia sosiedade ohin loron iha realidade paralela bo’ot rua. Iha sorin balun ita iha konsumidór kibi’it laek iha termu ekonomiku no konhesimentu. Iha fali sorin seluk, konsumidór sira ne’ebé bele kompara ho konsumidór sira iha pais avansadu ka modernu, hare husi asesu ba bens ho servisu sira.

Ohin loron ne’e, importante tebes atu konsumidór sira iha konhesimentu no konsiensia ba buat sira neébé konsumu, no impaktu husi ninia eskoilla, ba nia, ba nia família, ba sociedade no ba meiu ambiente.

Ho restaurasaun independensia, konsumnidór sira hetan asesu ba produto importadu sira barak tebes, ne’ebé, altera komletamente habitu iha konsumu. Ijemplu maka, konsumu ba be’e mos, antes garantidu ho abastesimentu husi be’e publika, agora passa ba be’e engarrafada ( iha masa ho botir) ne’ebé faan iha merkadu ka loja sira. Impaktu bo’ot ida hosi mudança ida ne’e maka, kuantidade embalajen plastiku sira ne’ebé ita soe, hodi fó origem ba foer sira iha dalan no fatin lixo sira, hodi agrava liu tan inundasaun no degradasaun ba meiu ambiente.

Atu salva ita nia planeta, konsumidór sira tenki sai responsável , hanoin ba jerasaun sira tuir mai iha futuru, iha komprimisiu hodi hamenus lixo, hamenus matéria prima no rekursu sira ne’ebé hasai husi natureza hodi redus mos poluisaun ligadu ho kadeias extrasaun nian, transformasaun, produsaun no distribuisaun. Liu hosi uja fila fali (reutiliza), resikla no hadiak fila fali (reparar)

Konsumidór sira mos tenki hahu hanoin iha konsumu local ou konsumu proximidade. Vantagen bo’ot ida husi konsumu local maka hamenus sirkuitu husi distribuisaun, tamba hamenus emisaun karbonu husi transporte sira. Produto local mos utiliza menus embalagen (falun) ne’ebé maka kontribui mos ba halo menus volume lixo no desperdisiu.

Responsável mos katak, hatene didiak ita nia direitu sira hanesan konsumidór, no hatene wainhira ita nia direitu sira ema la respeita, ita halo kedas reklamasaun ba vendedor ou husu ajuda ba iha TANE. Halo ida ne’e, hodi rejolve ita nia problema iha konsumu no ajuda mos atu evita problema ba konsumidór sira seluku iha futuru. Hamutuk ita kontribui ho ita nia asaun sira ba sosiedade ida ne’ebé justa no defende ambiente.