Tane Konsumidor

(+670) 3310938
cac@tanekonsumidor.tl

Notísia fulan outubru nian
Oinsá atu reklama? Aprende oinsá, hosi pasu ba pasu!

Loos duni katak, ita-bot hola ona produtu ka servisu maibé kualidade la agrada ka satifaz ita, no ita sente iha nesesidade atu manifesta ita-bot nia desagradu sira. Maibé, ho falta iha pasiénsia, falta abertura hosi fa’an-na’in ka falta koñesimentu, ita-bot deziste atu halo reklamasaun. Iha situasaun hirak hanesan ne’e, tenke hanoin nafatin katak: reklama ne’e hanesan direitu ida. Konsumidór iha direitu atu satisfeitu ho sasan ka servisu ne’ebé maka adkire no iha satisfasaun ba sira nia nesesidade sira.

Reklamasaun sira laós de’it nesesariamente negativa ka konflituoza. Maibé, hanesan oportunidade hosi rezolve problema sira. Importante liu maka nafatin mantein kalma, tenke ser asertivu no objetivu no mantein komunikasaun ida ne’ebé maka di’ak entre parte-rua. Hotu-hotu tenke manán ho rezolusaun ba reklamasaun sira – katak, ita iha konsumidór ne’ebé maka ezijente no merkadu kada loron sai transparente no justu.

IMPORTANTE! Nafatin rai fatura produtu ka servisu sira ne’ebé adkiri ona, tan ida ne’e importante tebes wainhira ita hakarak halo reklamasaun ida, ativa garantia ka bele mos halo troka/devolusaun.

Buka nafatin atu rekolla informasaun hotu iha momentu atu halo kompra, liuliu konabá kondisaun atu troka, devolusaun, garantia no asisténsia hafoin-hola (pós-venda).

Pasu dahuluk – Kontatu ho empreza ne’ebé atu reklama ba
Kontatu ho empreza ka fa’an-na’in. Bele explika verbál konabá problema, no dala-wa’in bele iha rezolusaun. Karik ida ne’e maka la akontese, entaun bele halo ita nia reklamasaun ho eskritu.

Pasu daruak – rai hamutuk informasaun no dokumentu sira
Rai hamutuk dadus no kontatu empreza nian ne’ebé hakarak reklama ba.
Dokumentu apoiu ba reklamasaun hotu-hotu rai hamutuk, hanesan (fatura sira, fotografia produtu sira (karik iha), kontratu, nota entrega, nst.) e kópia hafoin entrega ba vendedór.

Pasu datoluk – hakarek textu ida, explika konabá okorénsia
Prepara karta ida no hakerek hotu detalle sira ne’ebé maka akontese, keta haluha tau mos loron ba kompra nian. Identifikasaun vendedór, problema sira ne’ebé maka iha, solusaun ne’ebé maka ita hakarak. Bele mos hakerek uza komputadór ka ho liman, maibé tenke mós. Rai hamutuk dokumentu nesesáriu sira. Ho hafoin entrega karta, importante tebes atu rai hela kópia ida ba dokumentu sira ne’e.

Pasu dahaat – haruka reklamasaun eskrita ba empreza reklamada
Iha pasu atu haruka dokumentu sira tenke prefere dalan ida ne’ebé bele iha komprovativu haruka nian, liu-liu hosi e-mail ka bele mos entrega diretamente. No husu atu vendedór atu asina kópia ka resibu simu nian hodi deklara katak simu ona ita-bot nia reklamasaun.

Pasu dalima – Hein resposta hosi empreza
Tenke hein durante loron sanolu-resin-liman (15 dias) ba resposta hosi empreza. Karik ita hakarak, bele kontatu empreza atu solisita resposta.

No se ita simu resposta ne’ebé maka pozitivu ne’ebé maka bele rezolve ita nia problema, ne’e di’ak liu tan, no ita nia kazu bele rezolve ona. Maibé se la iha resposta ne’ebé halo ita-bot satizfeitu, entaun bele buka ajuda ho entidade seluk.

Pasu daneen – Denúnsia ba TANE Konsumidor ka ba Autoridade Reguladora sira
Se hanesan ita nia direitu ida, exije atu nune’e iha respeitu. Karik la iha resposta hosi empreza, ka se resposta maka negativa ka se resposta hatudu insatizfasaun, entaun tempu ona atu tau hamutuk kópia reklamasaun nian no ita-bot nia dokumentu sira no husu ajuda ba TANE.

Bele mos enkamiña ita nia reklamasaun para entidade reguladora no fizkalizadora sira (bele haree sesé iha ami nia site)

Nunka husik liu leet atu defende ita-bot nia direitu sira!
Kontatu ami. TANE ajuda imi atu defende imi nia direitu no interese sira.
Hamutuk ida sai forte liu tan!

Vizita ami nia site www.tanekonsumidor.tl, hakerek ba ami hosi cac@tanekonsumidor.tl no partisipa iha ami nia pájina Facebooke https://www.facebook.com/TaneKonsumidor, ho like, komentáriu no partilla sira!