Tane Konsumidor

(+670) 3310938
cac@tanekonsumidor.tl

IHA NE’EBÉ MAKA ITA HOLA SASAN BARATU LIU?
HARE CABAZ NATAL NE’EBÉ TANE PREPARA ONA

 

Hanoin ba preocupasaun konsumidor sira nian konabá hola sasan atu festeja Natal no tinan foun, loron sira ne’ebé kostuma simu família no amigu sira iha uma, TANE halo levantamentu folin hosi produto ai-han sira, atu informa ba konsumidor sira, konabá Supermerkadu sira ne’ebé maka folin kiik liu.

Iha Dezembru 2021, loja sira ne’ebé globalmente baratu liu iha Díli maka: Grasa (Comoro), Phoenix 368 (Akait) no W-four (Comoro)

Rekolla ba folin halao iha dia 2 to dia 10 fulan Dezembro 2021, iha loja sanulu resin sia (19) ne’ebé situa iha posto administrativo tolu município Díli nian. Produto ai-han sanulu resin walu (18) ne’ebé maka Timor oan sira konsumu barak liu iha Natal no mos iha tinan tomak nia laran. produto sira iha cabaz ne’e maka foos, naan (nan manu no karau), masin midar, farinha trigu, manteiga, mina, susu bem (rahun), manu tolun, ai fuan (sabraka ho masan), moda tahan (fehuk, senoura, tomate), refrigerantes (minuman ringan), cerveiza.

Divulgasaun ba folin hanesan kontributu ida ba transparensia no kompetitividade iha merkadu, tamba komersiante sira hetan insentivu atu melhora sira nia politika ba folin, no sira nia relasaun ho Konsumidor.

Kriteriu ne’ebé maka utiliza iha eskolla folin maka identifica iha estabelesimentu sira hotu produto ho folin kiik liu ba kada kategoria, la hare ba marka ka orijin. Nune’e TANE konklui katak loja ka supermerkadu baratu liu maka Grasa Shop iha Comoro, posto administrativo D.Aleixo ho valor total $44,30. Supermerkadu ho cabaz karun liu maka Searra B.º Central, posto administrativo Nain Feto, ho valor total $61,55. Hare ba rezultadu ne’ebémaka hetan ita bele dehan katak, hili loja neébé baratu liu, konsumidor bele poupa to’o $17,25.

Importante salienta katak iha cabaz baratu liu laos significa katak produtu sira hotu iha ne’eba mesak baratu hotu kedas, hanesan bele hare iha tabela, Tomati no nan karau mak baratu liu iha Phoenix 368 iha akaiat, naan manu iha W-Four iha Colmera no foos iha Centro bidau nian.

Variasaun ba folin iha estabelesimentu sira sei nafatin ass, ida ass liu maka mateiga ho variasaun $417%, hosi folin $0,30 to’o $1,55. Fehuk ho tomoti mos iha variasaun folin ass, folin tomati nian bele varia hosi $0,75 to’o $2,50 no fehuk hosi $0,75 to’o $3,50.

TANE fo konsellu ba konsumidor sira atu jere diak orsamentu iha epoka ne’ebé konsumu aumenta. Antes atu hola sasan, importante ita hatene osan hira mak iha atu gasta, no halo lista buat sira ne’ebé maka falta duni. Tenki halo hela deit komparasaun produto ai-han sira ninia folin iha estabelesimentu komersial sira no hili ida baratu liu no asesivel liu ba ita nia karteira. Kumpri ka halo tuir orsamentu ne’ebé ita iha fundamental tebes, atu la gasta liu buat ne’ebé ita iha, lebele hola buat sira ne’ebé ita la presija.

TANE fo hanoin ba consumidor sira atu tau atensaun ba segurança ai-han, no mos hare ba kondisaun sira konservasaun ai-han, antes no depois de hola mai, data validade ai-han sira nian no pratika saudável sira ijieni nian no seguransa atu tein ai-han sira.

Konsellu sira hotu TANE nian, atu ajuda konsumidor Timor oan sira sai informadu no bele hola sasan ho diak no defende sira nia direitu, bele hare online, iha Facebook (https://www.facebook.com/TaneKonsumidor) no iha Página web (https://tanekonsumidor.tl).

TANE dejeja ba konsumidor sira hotu festa ksolok, ho responsabilidade no moderasaun.

Hare informasaun iha Tabela!

Cabaz-Natal-2021-Tabela-comparativa