Tane Konsumidor

(+670) 3310938
cac@tanekonsumidor.tl

Publisidade Bosok-ten – Konsumidór sira iha Direitu saida?

Mundu ohin loron hale’u ho publisidade. Dala-wa’in ita sai sujeitu ba estímulu ne’ebé buka ita hodi hola produtu ka servisu ruma.
Publisidade ohin loron iha fatin hotu-hotu - iha televizaun, iha jorál sira, iha rádiu, iha dalan, iha internet, iha ita nia kaixa korreiu. Publisidade uza dalan (estratéjia) oinoin atu lori konsumidór sira sosa, ida sai lejítima liu ida seluk, no sira ne’e hotu dala barak la iha aseitasaun no kontra lei.
Ho nune’e, ita hotu tenke kuidadu atu publisidade labele bosok ita.

Saida maka publisidade bosok-ten?

Publisidade hotu-hotu ne’ebé maka afirma ka lori konsumidór atu fiar katak servisu ka sasán ida iha determinadu karakterístika maibé iha realidadde la iha.

Konsumidór sira iha direitu atu ezije kumprimentu ba buat hotu ne’ebé maka anunsia ona. Se anunsiu ruma fó sai (divulga) servisu internet ilimitadu, ida ne’e tenke tuir saida maka iha anunsiu. Maibé, dala barak ida be fa’an (vendedor) labele ka lakohi halo tuir buat ne’ebé anunsia ona. Hanesan kazu telemóvel publisitadu ne’ebé iha rezisténsia ba be, maibé, udan kona ituan de’it, estraga ona. Sasán ka servisu ruma ne’ebé maka la korresponde tuir buat ne’ebé maka promete ona, konsumidór sira bele kansela kompra ka kontratu no simu fila valór ne’ebé maka selu tiha ona, la ho penalizasaun ruma.

Saida maka Lei dehan?

Lei hodi fó Protesaun ba Konsumidór sira habandu publisidade bosok-ten no Rejime Jurídiku ba Atividade Publisitária sira ne’ebé maka define regra espesífika sira ba iha publisidade.

Mensajen publisitária sira tenke lolós, momós, fasil atu identifika no kompreende. Labele hafalun, nein hakarek ho forma ne’ebé komplikada hodi impede ninia kompreensaun.

Konteúdu sira hosi anunsiu nian tenke ser lós no fiel ba karakterístika ne’ebé maka oferese ba.

Labele bosok ka hafalun karakterístika sira konabá folin no kondisaun pagamentu sira no entrega ka fó fila, garantia, kustu ba entrega ka kustu extra sira seluk, risku ba uza no manuzeamentu ba produtu sira, nst.

Publisidade tenke hakerek no ko’alia iha dalen tetum ka portugués, ka tradúz karik orijinalmente iha lian seluk. Folin tenke expresu ka taka iha moeda ofisiál - dólar amerikanu.

Ikus-liu, publisidade tenke respeita ba prinsípiu no valór sira hosi estadu demokrátiku, labele iha diskriminasaun no tenta atu kontra dignidade ita ema nian no labele hamosu violénsia.

Tan ne’e, wainhira iha dúvida ruma, ita enganadu ka hasoru publisidade bosok-ten, ko’alia ho TANE.

Centro de Apoio ao Consumidor TANE nian, apoia tiha ona timór-oan barak sira nia dúvida sira, denúnsia, keixa no pedidu ba informasaun konabá sira ninia direitu hanesan konsumidór.

Rai ami nia kontatu sira: telefone 3310938, e-mail cac@tanekonsumidor.tl no fatin Travessa Vila verde – Aldeia Gideon – Díli.

Tuir ami iha Facebook hodi simu ami nia novidade no konsellu sira: facebook.com/TaneKonsumidor.

No vizita ami nia site, se ita presiza informasaun ruma tan, www.tanekonsumidor.tl .
TANE ajuda imi hodi defende imi ninia direitu no lejítimu interese sira.