Tane Konsumidor

(+670) 3310938
cac@tanekonsumidor.tl

Publisidade Bosok-ten – oinsá atu hatene se ema seluk bosok ita?

Publisidade iha fatin hotu-hotu no dala-wa’in laós publisidade ne’ebé maka lós. Hanesan ami explika ona iha ami nia artigu liu ba, publisidade iha regra sira ne’ebé maka tenke halo tuir ka kumpre. Konsumidór sira bele defende-an ba mensajem publisitária sira, maibé iha ituan maka koñese sira ninia direitu no konsegue prátika di’ak ruma.

TANE husik hela konsellu balun atu ita labele monu ba bosok no ba armadilla ba publisidade ida ne’ebé la iha transparente no bosok-ten:

 Labele fiar iha kura milagroza ne’ebé promete atu hapara moras sira, impede atu envellese lais ka rezolve ita nia problema pesoál. Deskonfia.
 Molok atu husu ka aseita produtu ka servisu gratuita sira, vefika didi’ak se gratuita tebes duni. Tan dala barak, iha kondisaun sira ne’ebé la publika sai. Ezemplu hanesan, bele obriga atu hola tan sasan seluk ida, bele iha presu ba entrega, bele servisu gratis durante tempu baluk de’it maibé hafoin tenke komesa atu selu.
 Iha rezista ba promesa ba fortuna ba jogu ajár sira. Ema ida de’it hosi millares maka atu manán, no wainhira ita tenta atu manán, konsumidór sira gasta barak hosi sira ninia orsamentu, dala barak nesesáriu atu sustenta nia família.
 Kuidadu ho publisidade ne’ebé maka lori ita ba komportamentu risku nian, hanesan oinsá atu konduz empreza, hemu ka fuma barak atu iha estilu. Konteúdu publisidade hirak ne’e probidu no ami husu ba konsumidór sira iha moderasaun no kuidadu ho imi nia vida no saúde.
 Atensaunba publisidade sira ne’ebé relativa ho hotel sira, apartamentu ka uma sira. Dala-wa’in sira oferese tipolojia ba produtu oinoin, maibé sira tau imajem ida ne’ebé maka karun liu ho folin ne’ebé maka baratu. Konsumidór hanoin katak, iha hotel sira ba hetan kuartu boot no hateke hasoru ba tasi maibé hetan fali kuartu kiik no vista ba fali parede seluk.
 Iha publisidade konabá viajem sira, haree didi’ak folin sira. Anusiante sira hatudu presu ne’ebé kiik no boot, ka, selu mínimu atu halo viagemno máximu opta ba buat extra hotu, hanesan alojamentu, refeisaun, transfer, nst.

Vale a pena ita reklama – mai koñese kazu susesu

TANE rejistra kazu barak, hanesan denúnsia hosi konsumidór ida ne’ebé maka sente ema bosok liu hosi anúnsiu publisitáriu ida ne’ebé maka promove folin espesialmente kiik. Loja refere tau iha entrata ho placa ida dehan nune’e “hosi $1 to’o $10”, hafoin konsumidór tama tiha ba loja laran, hanoin atu hetan de’it sasán ho folin entre $1 to’o $10. Maibé, nia deskobre kedas katak iha produto barak maka ho folin liu $10.
Konsumidór refere, kontatu kedas TANE atu husu esklaresimentu se hahalok ne’e violam Lei hodi nune’e nia bele denúnsia situasaun ne’e.
Ida ne’e hanesan publisidade enganosa ho omisaun. Loja labele bosok katak sasán ne’ebé maka sira fa’an kusta de’it ho folin entre $1 no $10.Maibé, anúnsiu ne’e, ho falta ba klareza no informasaun kompleta lori konsumidór sira hanoin katak ida ne’e makafolin úniku ne’ebé maka sira pratika, estimula interese konsumidór sira nian atu tama ba loja, no provavelmente,hodi gasta arbiru osan.
TANE kontatu kedas no empreza reklamada, explika ba sira konabá importánsia atu adota prátika ne’ebé justu no transparente iha redasaun ba sira nia mensajem publisitária sira. No loja hasai plaka, ho kompromisu respeitu ba Lei no ezijénsia sira hosi TANE no konsumidór sira.

Tan ne’e, wainhira iha dúvida sira, ema bosok ka hetan publisidade bosok-tem, ko’alia ho TANE.

Centro de Apoio ao Consumidor TANE nian, fó apoiu timór-oan barak nia duvída sira, denúnsia, keixa, no pedidu ba informasaun sira konabá sira ninia direitu hanesan konsumidór
Rai ami nia kontatu: telefone 3310938, e-mail cac@tanekonsumidor.tl no fatin Travessa Vila verde – Aldeia Gideon – Díli.
Tuir ami iha Facebook atu nune’e bele simu novidade no konsellu ne’ebé di’ak: facebook.com/TaneKonsumidor.
No vizita ami nia site se wainhira imi presiza irformasaun iha www.tanekonsumidor.tl .
TANE ajuda defende imi nia direitu no lejpitimu interese sira.