Tane Konsumidor

(+670) 3310938
cac@tanekonsumidor.tl

DIREITU BA INFORMASAUN: AFIXASAUN FOLIN

Maluk konsumidór sira hotu,

Fulan ida ne’e ami sei lori ita ba hatene konabá direitu ba informasaun, liuliu konabá afixasaun folin ba sasán no servisu sira hanesan direitu fundamentál ida ba emar konsumidór sira nian.
Atu garante relasaun entre konsumidór no komersiante sira justu no ekilibrada nomos buat seluk, importante tebes, garante kualidade ba produtu no servisu sira, transparénsia ba folin no asesu ba informasaun ida ne’ebé loos, klaru, objetiva no fasil atu kompreende.

Folin ba sasán no servisu hirak ne’ebé ita adkire ona hanesan aspektu ida ne’ebé kontempla iha direitu ba informasaun nune’e mos dala-wa’in fatór refere maka hamosu dúvida no difikuldade sira. Lei hodi halo Protesaun ba Konsumidór sira hatudu ho dalan klaru ba iha obrigasaun hodi afixa ka taka folin sira ho forma ida ne’ebé oinsá bele komunika.

Hanesan konsumidór, importante tebes atu ita hatene regra sira ne’e hodi bele defende imi ninia direitu no interese ekonómiku sira. Tuir experiénsia ne’ebé maka TANE iha, iha merkadu Timór iha falla ka erro barak tebes. Ami simu denúnsia lubuk konabá falta ka la iha indikasaun folin, no eziste folin oinoin no iha moeda ka osan estrajeira nian.

Atu ema seluk labele bosok ita boot sira, lé ho atensaun konsellu tuir mai!
Regra sira konabá afixasaun folin

1 – Folin totál ka tuir unidade
Sasán ka produtu hotu ne’ebé maka destinadu ba fa’an retallu ka rahun tenke hatudu folin sira fa’an nian ba hola-na’in sira (folin totál inklui mos taxa no impostu hotu).
Jéneru aihan no sasán ka produtu laós alimentár sira ne’ebé maka tau ho dispozisaun ba kosumidór sira tenke iha mos folin kada unidade ba medida (litru, kilograma, metru, nst). Produtu sira ne’ebé fa’an ho granel bele indika de’it folin ba unidade medida.
2 – Folin ne’ebé maka ema bele haree no iha osan nasionál
Folin ba fa’an no folin ba unidade ba medida tenke ser hatudu ka indika ho dijítu sira. Ho dalan ida ne’ebé ema bele haree, momos, fasil no perfeitamete bele haree liu hosi etiketa ka letra sira.
Osan ne’ebé maka tenke ser uza maka osan nasionál – dólar amerikanu.

3 – Folin ne’ebé maka taka tenke besik ba sasán ka servisu
Folin ne’ebé maka taka ba sasán tenke besik ba sasán ne’e rasik ka fatin prestasaun ba servisu ne’ebé tau ba públiku, ho dalan labele hamosu dúvida ruma ba konsumidór.
Sasán hirak ne’ebé maka rai ka tau iha montra ka vitrine sira, públiku tenke haree iha exterór ka interiór hosi estabelesimentu ne’e rasik, tenke mos iha markasaun komplementár wainhira etiketa sira ne’e la dun haree ho di’ak.
4 – Folin ba servisu sira

Folin ba prestasaun servisu sira hotu hosi natureza oinoin, tenke iha mos ka konsta lista ka taka ho kartaz sira, ho forma ne’ebé maka bele haree, iha fatin ne’ebé maka servisu ne’e rasik rai ba ka presta ba konsumidór.

Iha servisu hirak ne’ebé maka presta tuir oras, persentajem, tarefa ka tuir kritériu saida de’it, folin sira tenke hatudu ho referénsia ba kritéria ne’ebé hodi uza. Se iha taxa ba deslokasaun ka seluk ne’ebé maka iha karik, tenke hatudu ho espesífiku.

Agora, ami fiar katak, hafoin ita boot sira lé tiha notísia ne’e, sei haree ba etiketa ba folin sira ho forma ne’ebé direfente.

Se ita iha dúvida ruma, esklarese. Se iha insatisfasaun ruma, reklama.
Konta mos ho TANE atu defende imi nia direitu no interese sira.

Vizita ami nia site www.tanekonsumidor.tl, hakerek ba cac@tanekonsumidor.tl no partisipa iha ami nia Pájina Facebook https://www.facebook.com/TaneKonsumidor, ho like, komentáriu ka partilla sira!