Hau hakarak kongratula Tane Konsumidor , tamba nia naran komesa ona sai rekonhesidu husi loja sira iha Timor-Leste
Iha inisiu fulan Novenbru hau ba hola sasan ho amiga ida, ami ba Meimart iha Av. Presidente Nicolau Lobato, hau nia amiga hola deterjente ben marka OMO ba makina fase roupa, ne’ebé maka taka hela nia folin 7,50 USD, maibe ba fali iha kaisa/kasir nia folin sae ba 12,50 USD. Ami husu para bolu jerente hodi tau fila fali nia folin ba 7,50 USD , iha tia konfuzaun uituan entre jerente ho empregadu balun (hare katak empregadu sira tau salu tia ona nia folin) jerente fó hatene ba hau nia amiga katak folin atu selu maka 12,50 USD se lakoi bele sai husi loja. Bele la akontese direitamente mai hau, maibe hau interven hasoru jerente loja nian no informa ba nia katak se la tau fali folin ba 7,50 USD (hanesan taka iha produtu nia lolon) hau sei ba kesar ba Tane Konsumidor, hare ba nia konportamentu muda kedas no aseita hau nia kolega selu tuir folin ne’ebé maka taka iha produtu ne’e, mak 7,50 USD.
Semana ida liu tia akontesimentu ba hau nia amiga ne’e, hau ba Meimart Timor Plaza no hola JP branku botir rua, folin iha botir nia lolon 8,5 USD kada ida, ba fali iha kasir folin sae fali ba 25 USD , hau fó hatene ba menina iha kasir katak folin labele ida ne’e tamba kada ida folin 8,50 USD.
Hau husu para bolu ema ida, ne’ebé maka mai no husu atu hau hein, hau fó hatene katak hau ansi los tamba taxi hein hela hau no se la rezolve situasaun ne’e hau sei halo reklamasaun ba Tane Konsumidor foin sae ida dala ruma nia maka subjerente, dehan mai hau, ba halo reklamasaun ba!!!, maibe jerejte husu atu hein no hau halo tuir, nia telefone tia no koalia liu husi WhatsApp no ikus liu mosu notisia diak katak hau sei selu tuir folin ne’ebé taka iha botir lolon 8,50 USD ne’ebé maka total hetan deit 17USD.
Hau hakarak fo solisitasaun ba Tane Konsumidor atu kontinua halo kampaña hamutuk ho potensial konsumidor sira, fó hanoin ba sira kona-ba sira nia direitu hanesan konsumidor, tamba hau fiar katak barak maka seidauk hatene.
Hau nia melhor kumprimentus, Carla Caetano