Iha loron 15 fulan marsu 2023, Asosiasaun TANE konsumidór komemora loron mundial ba direitu konsumidór sira nian hodi informa ba públiku atu labele soe foer arbiru no soe foer iha fatin ne’ebé governu prepara ona.
Iha komemorasaun ne’e prezidente Asosiasaun TANE konsumidór António Ramos da Silva hateten, lixu soe arbiru sei fó impaktu ba ema nia saúde nomós ba biodiversidade iha tasi laran.
“Lixu soe arbiru de’it la iha fasilidade hodi fahe lixu, impaktu ba saúde públiku meiu-ambiente, estraga ba ita-nia tasi no animal sira iha tasi laran”. Dehan Prezidente TANE.
Aleinde ne’e prezidente TANE mós husu ba autoridade públiku sira atu tau interese ba problema lixu hodi proteje saúde públiku no ambiente.
“Husu mos ba autoridade públiku sira foti polítika públika ne’ebé mak di’ak ba saúde públiku no ambiente, liuhusi harii fasilidade hanesan ekopontu iha fatin-fatin hodi hafahe lixu tuir idak-idak nia fatin”. Nia hatutan.
Iha komemorasaun ne’e prezidente TANE husu ba emprezáriu sira atu introdúz ekonomia sirkulár nune’e bele fó benefisiu ba konsumidór sira hotu, ba estadu no ba operadór ekonómika sira hodi lori benefisiu ba dezenvolvimentu ekonómiku ne’ebé sustentavél.