Iha loron 17 Abril tinan 2023 Asosiasaun Tane Konsumidór hala’o konferénsia imprensa kona-ba solusaun sanulu-resin ualu ne’ebé bele rezolve problema husi konsumidór sira.
Liuhusi biban ida ne’e Prezidente Asosiasaun Tane Konsumidór António Ramos da Silva hateten objetivu husi konferénsia ne’e atu hato’o ba partidu polítiku sira hodi tau importánsia ba diretu konsumidór nian iha kampaña eleisaun ne’ebé sei mai, koloka mós problema konsumidór sira iha sentru debate."Solusaun sanulu-resin ualu (18) ba rezolve problema konsumidór sira nian, aprezenta ba partidu polítiku sira para bele lori problema konsumidór sira-nian sai hanesan debate no bazeia ba proposta ne’ebé Tane hato’o", dehan Prezidente TANE.
Iha fatin hanesan Prezidente TANE hatutan, TANE hili ona mensajen husi konsumidór na’in neen ne’ebé konsidera nu’udar importante iha area neen. "Iha ne’e ami hili área neen (6) maka asesu ba ai-han, asesu ba informasaun, enérjia, direitus e garantia, telekomunikasaun no agua e saneamentu nomós mobilidade. Husi problema sira ne’e bazeia ba konsumidór sira-nia problema ne’ebé mak konsumidór sira aprezenta mai iha TANE", Nia hatutan.
Aleinde ne’e Nia mós haktuir katak solusaun lei nian maka liuhusi kadernu revidikativu ne’ebé TANE aprezenta tiha ona ba governu. "No solusaun ida tan husi lei nian mak liuhusi kadernu revidikativu ne’ebé TANE aprezenta tiha ona iha tinan tinan kotuk ba governu liuhusi konsellu ministru mas tanba ne’e badak liña ministeriais sira balun mós seidauk tau iha planu lejislativa superioridade hodi regulariza di’ak liután lei protesaun konsumidór", haktuir Prezidente.
Iha konferénsia imprensa ne’e partisipa husi média Timor-Post, Business Timor, Dili Post nomós estudante estajiáriu Departamento de Comunicação Social UNTL.