Iha loron sexta-feira loron 11 Agostu 2023, Centro de Apoio ao Consumidor TANE nian, simu keixa husi konsumidóra Delfina Maia hodi alega katak iha dia 30 de Julho 2023 lori Telemovel ho marka Samsung S7 ba hadia ninia layar ho osan $50 Konsumidora hein kedas hodi foti telefone ne’e. To’o iha uma konsumidora ne’e hare telefone nia layar mosu riska barak no la mos, camera mos kabur entaun iha loron ne kedas konsumidora preukupada uituan nia labele lori fila kedas telemóvel maibe iha loron tuir mai, nia lori ba koalia ho staff sira loja nian para atu husu hadia fila fali, tamba tuir Nota ne’ebé mak loja fó iha garantia semana ida, staff ba hato’o kedas ba sira ninia patraun maibe patraun hatete haruka amenta tan $30 maka sira bele hadiak fila fila.
Iha segunda-feira loron 14 Agostu 2023, TANE dezloka kedas ba koalia ho loja nain hodi fó hatene kona-ba denunsia ne’ebé maka konsumidora hato’o ba TANE no explika tuir Lei ne’ebé maka vigora iha Timor-Leste hodi fó protesaun ba konsumidor, maka, Lei n.º 8/2016 de 8 de julho, no hetan reasaun pojitiva tebes husi parte loja nian hodi hadik fila fali telemóvel gratis no konsumidora satisfeita loos tamba simu kedas telemóvel ho kondisaun ne’ebé diak.
TANE hakarak husu ba konsumidor sira hotu atu bele mai hato’o keisa ba ami, wainhira ba hola sasan ka hadiak sasan ruma no sente la satisfeitu ka repara katak buat ruma la los no ita bo’ot sira nia direitu violadu. Tamba hó ita nia servisu hamutuk maka bele hamenus problema ba relasaun de konsumu iha ita nia rai laran.